«Pähim-paýhas ummany Magtymguly Pyragy» ýylynda Akdepe etrabynyň Üç kepderi geňeşliginiň çäklerinde has tapawutlanyp zähmet çekýän Yhlas Şermetow 2020-nji ýylda 116 gektar ýeri 99 ýyllyk möhlete peýdalanmaga aldy we ony agrotehnikanyň talaplary esasynda bejerip, ýylyň-ýylyna gowy netije gazanmagyň hötdesinden gelýär. Üstümizdäki ýylda Yhlas öz ýeriniň 90 gektaryna gowaça, 20 gektaryna «Sähraýy» görnüşli bugdaý ekdi. Ol Jennet Halbaýewa, Ilmyrat Şermetow, Toýlybaý Baýryýew, Merdan Annaýew, Şatlyk Berdimyradow dagy bilen agzybirlikde zähmet çekip, şol ekinlerden bol hasyl almagyň hötdesinden geldi.
— Türkmen halkynyň Milli Lideri Gahryman Arkadagymyzyň we hormatly Prezidentimiz Arkadagly Gahryman Serdarymyzyň oba hojalyk pudagyny döwrebap ösdürmek ugrunda edýän tagallalaryna 116 gektar ýerimde halal zähmet çekmek bilen jogap berýärin. Haçanda ruhy belent bolanda ynsanyň zähmet ukyby has-da ýokarlanýar. Nesip bolsa, ýygym möwsüminiň ahyryna çenli döwlete 150 tonna pagta tabşyrmaga borçlanýaryn — diýip, Yhlas Şermetow ynamly aýtdy hem-de daýhanyň netijeli işlemegine giň mümkinçilikleri döredip, eşretli durmuşy peşgeş beren türkmen halkynyň Milli Lideri Gahryman Arkadagymyza we hormatly Prezidentimiz Arkadagly Gahryman Serdarymyza çäksiz hoşallygyny beýan etdi.
