14-nji noýabrda Türkmenistanyň Beýik Saparmyrat Türkmenbaşy adyndaky Baş akademiki drama teatrynda «Bagtyýarlyk döwrüniň teatr sungaty» atly IV halkara festiwalyň açylyş dabarasy boldy. Oňa dünýäniň birnäçe ýurtlaryndan teatr sungatynyň ussatlary, artistler gatnaşdylar. Halkara festiwalyň açylyş dabarasynyň başynda hormatly Prezidentimiziň oňa gatnaşyjylara iberen Gutlagy okaldy. Hormatly Prezidentimiziň Gutlagynda şeýle bellenilýär: «Arkadag Serdarly bagtyýar ýaşlar ýylynda halkymyzyň asyrlaryň jümmüşine uzaýan taryhy-medeni köklerini, ajaýyp teatr sungatyny, milli medeniýetini we nusgalyk ruhy gymmatlyklaryny dünýä jemgyýetçiligine giňden ýaýmakda bu halkara teatr festiwalynyň ähmiýeti örän uludyr. Dünýäniň, şol sanda sebitiň sungat ussatlarynyň, dramaturglarynyň, alymlaryň gatnaşmagynda geçirilýän bu forumyň meşhurlygy, abraýy, derejesi örän ýokarydyr. Onda teatr, aýdym-saz we tans sungatlarynyň, jemgyýetiň umumy intellektual derejesiniň ähli inçelikleri öz beýanyny tapar. Berkarar Watanymyzda geçirilýän bu halkara festiwal şöhratly taryha, medeni mirasa örän baý türkmen halkynyň ruhy galkynyşynyň ýeten derejesini açyp görkezýän özboluşly baýramdyr. Şeýle halkara festiwallar ösüp gelýän ýaş nesilleriň dünýä halklarynyň medeniýetleri, häzirki zaman teatr sungaty bilen ýakyndan tanyşmagyna uly ýardam berýär».
Soňra dostlukly döwletleriň sungat wekilleriniň festiwala gatnaşyjylara gutlag çykyşlary ýaýbaňlandyryldy. Uly joşgun bilen geçirilýän bu halkara teatr festiwaly adamlary birek-birek bilen ýakynlaşdyrýar, tejribe alyşmaga, sungatyň inçe syrlaryny içgin öwrenmäge ýardam berýär. Halkara teatr festiwaly dünýä döwletleriniň arasyndaky medeni gatnaşyklaryň täze derejelere göterilýändigini ýene-de bir gezek subut edýär.
