Sungat halklary ýakynlaşdyrýan, ruhy birlige ündeýän güýçdür. Ol kalplardan kalplara geçip, milletleriň aňyýetine ornaşýar. Pikir akabalaryny, ýagşy duýgulary kalplara siňdirýär.
Ine, ýakynda Arkadag şäheriniň Aman Gulmämmedow adyndaky döwlet drama teatrynda açylan «Arkadagyň säheri» atly halkara kinofestiwaly geçirildi. Bu döredijilik çäresi Merkezi Aziýa ýurtlarynyň kinematograflarynyň gatnaşmagynda ýurdumyzda ilkinji gezek guraldy. Kinofestiwalyň açylyş dabarasyna ministrlikleriň we pudaklaýyn dolandyryş edaralarynyň, jemgyýetçilik guramalarynyň, köpçülikleýin habar beriş serişdeleriniň wekilleri, Arkadag şäheriniň ýaşaýjylarydyr myhmanlary, Azerbaýjanyň, Gazagystanyň, Gyrgyzystanyň, Täjigistanyň, Özbegistanyň, Russiýanyň, Türkiýäniň, Fransiýanyň aktýorlary, režissýorlary, kino we teatr artistleri, prodýuserleri gatnaşdylar. Bu ýere ýygnananlar Oguz han adyndaky «Türkmenfilm» birleşiginiň «Gyzyl kürte», «Wada», «Daragt», «Ýaşlar», «Kämillige ýol» atly filmleriniň döredijilik toparlaryny şowhunly el çarpyşmalar bilen garşyladylar. Soňra olaryň yzy bilen Gazagystanyň, Gyrgyzystanyň, Täjigistanyň, Özbegistanyň, Azerbaýjanyň wekiliýetleri geçdiler. Ýygnananlar gyzyl ýodadan geçen — Türkiýeden, Fransiýadan gelen myhmanlary, Oguz han adyndaky «Türkmenfilm» birleşiginiň «Istärin» filminiň döredijilik toparyny uly ruhubelentlik bilen garşyladylar. Daşary ýurtly döredijilik işgärleriniň kino eserleri hem tomaşaçylaryň gyzgyn goldawyna mynasyp boldy.
