KÖŇÜL GANATLANDYRYJY AÝDYMLARYŇ USSADY
Arkadagly Serdarymyzyň saýasynda gülläp ösýän inçe sungatlaryň biri-de köňülleri ganatlandyryp, kalplaryň taryna kakýan, buýsançly ýürekleri joşa getirýän aýdym-saz sungatydyr. Milli aýdym-saz sungatymyzyň pajarlap ösmegi üçin örän köp işler durmuşa geçirilýär. Diňe bir welaýat merkezlerinde däl, eýsem, her bir etraplardyr çetki obalarda-da giň mümkinçiligi bolan medeniýet ojaklary gurlup, ulanylmaga berilýär. Onda halypa ussatlar hem ýaş hünärmenler, aýdymçylardyr bagşylar yhlasly zähmet çekip, sungatymyzyň has-da gülläp ösmegi üçin öz şahsy goşantlaryny goşýarlar. Şeýle ýaş ussatlaryň biri-de Sakarçäge etrabynyň Gökhan geňeşliginiň ýaşaýjysy, Murgap etrabynyň Oguzhan şäherçe medeniýet öýüniň akkompaniator bagşysy Nurýagdy Bekiýewdir.
