Türkmenistanyň Prezidentiniň «Türkmeniň Altyn asyry» atly bäsleşiginiň çäklerinde dutarçy bagşy-sazandalaryň arasynda yglan edilen «Çalsana, bagşy!» atly bäsleşigiň Balkan welaýaty boýunça jemleýji tapgyry geçirildi. Balkanabat şäherindäki «Türkmeniň ak öýi» binasynda guralan dabara welaýatyň etrap-şäherlerinde deslapky gözden geçirilişde öňe saýlanan bagşylaryň 10-sy, sazandalaryň hem şonçasy gatnaşdy.
Mukaddes ýurt Garaşsyzlygynyň şanly 32 ýyllyk toýuna bagyşlanyp, baý many-mazmunda geçirilen bäsleşik milli aýdym-saz muşdaklaryna ýatdan çykmajak tolgundyryjy pursatlary peşgeş berdi. Milli öwüşginli, owadan sahnada ýerine ýetirilen aýdym-sazlary diňlemek diýseň ýakymly boldy. Bagşy-sazandalar bäsleşigiň şertlerine laýyklykda, türkmen halk aýdym-sazlaryny, mukamçy kompozitorlaryň döreden eserlerini ýerine ýetirmekde zehin-başarnyklaryny ýaýyp, halypa-şägirtlik ýörelgesini mynasyp dowam etdirýändiklerini aýan etdiler. Toý öwüşginli sahnanyň ruhubelentligini goşalandyran çykyşlar welaýatda milli saz sungatynyň ösmegine, gadymy senedimiziň baýlaşmagyna goşant goşýan zehinleriň az däldigine göz ýetirmäge mümkinçilik berdi. Bäsleşikde aýratyn tapawutlanan bagşylar — Maýa Kulyýewa adyndaky Türkmen milli konserwatoriýasynyň ikinji ýyl talyby Merdan Baýramgeldiýew, welaýat çagalar sungat mekdebiniň mugallymy Nurberdi Gulow (Türkmenistanyň halk artisti N.Gulowyň at dakylany), sazandalar — welaýat ýörite sungat mekdebiniň mugallymy Daýançmyrat Hangeldiýew, Türkmenbaşy şäheriniň çagalar sungat mekdebiniň mugallymy Rejepgeldi Aşyrow «Çalsana, bagşy!» telebäsleşiginiň ýurt derejesinde geçiriljek jemleýji tapgyrynda çykyş etmäge hukuk gazandylar.
