Daşoguz welaýatynyň demirgazyk künjeginde döredilýän tokaý zolagynda, bag nahallaryny oturtmagyň güýzki möwsümine taýýarlygyň çäginde, meýdan işleriniň nobatdaky tapgyryna girişildi. Zerbap lybasly güýz paslynyň tylla günlerinde bu sähranyň tutuş giňişligi ynsanyň gözellik döredýän zähmetine beslenýär. Şu günler täze tokaý zolagyna gurşalan Bötendag belentligine barýan uly ýoluň ugrunda sazak hem-de duzly gatlaga, şorlaşan topraga uýgunlaşan beýleki çöl ösümlikleri ekilýär, olara ideg hem gorag işleri geçirilýär. Sebitiň tebigy köpdürlüligini saklamaga, ekologik medeniýetini ýokarlandyrmaga täsir edýän şeýle çäreler toplumlaýyn esasda alnyp barylýar.

Gahryman Arkadagymyzyň başlangyjy esasynda, Sarygamyş kölüniň gündogar kenaryndan uzap gidýän 20 müň gektar meýdanda täze tokaý zolagy döredilýär. Welaýat merkezinden 200 kilometr çemesi uzaklykdaky giň sährada emele gelýän tokaýlyk Aral deňziniň guran ýerlerinden göterilýän tozanlaryň, köwsarlap öwüsýän güýçli ýelleriň zyýanly täsirini düýpli peseltmäge, ekologik howpsuzlygy üpjün etmäge mümkinçilik berýär. Yzygiderli häsiýetde amal edilýän uly möçberli işleriň netijesinde, häzire çenli 17 müň gektardan gowrak meýdanda ak hem gara sazagyň, dürli görnüşli çöl ösümlikleriniň 8 million 320 müň düýbi ekildi. Jemi tokaýlaşdyrmaly meýdanyň galan böleginde agrotehnikanyň talaplaryna laýyklykda joýalar çekildi, hatarara çukurjyklar gazylyp, ýerler güýzki möwsüme birkemsiz taýýar edildi.