Türkmenistanyň Demokratik partiýasynyň Ahal welaýat komiteti bilen «Ahal durmuşy» welaýat gazetiniň redaksiýasy tarapyndan bilelikde yglan edilen «Magtymguly Pyragy — adamzadyň ruhy hazynasy» atly döredijilik bäsleşiginiň jemi jemlendi. Şanly ýylymyzyň başynda yglan edilen bu bäsleşigiň esasy maksady Magtymguly Pyragynyň doglan gününiň 300 ýyllygynyň bellenilýän «Pähim-paýhas ummany Magtymguly Pyragy» ýylyny dabaralandyrmakdan, beýik akyldar şahyryň pähim-parasada ýugrulan şygyrlarynyň ähmiýetini açyp görkezmekden, arzuwlan berkarar döwletiniň ösüşlerini wasp etmekden, ildeşlerimizi döredijilikli işlemäge ruhlandyrmakdan ybarat boldy.

Bäsleşige dürli kärdäki we hünärdäki ildeşlerimiz, talyp ýaşlar özleriniň eserlerini hödürlediler. Bäsleşige ýollanan makalalaryň, oýlanmalaryň, çeper eserleriň, goşgularyň birnäçesi «Ahal durmuşy» welaýat gazetinde çap edildi. Eminler topary bäsleşige hödürlenen eserleriň iň gowularyny saýlap, ýeňijileri kesgitlediler. Şeýlelikde, döredijilik bäsleşiginde «Garagum» žurnalynyň jogapkär kätibi Nurtäç Annamuhammedowa birinji, žurnalist Gülsere Jumaýewa ikinji, mirasgär Atamyrat Şagulyýew, şeýle-de Magtymguly adyndaky Türkmen döwlet uniwersitetiniň mugallymy Toýly Hommyýew üçünji orna mynasyp boldular. Ak bugdaý etrabynyň Gämi oba Medeniýet öýünde geçirilen dabaranyň barşynda bäsleşigiň ýeňijileri Türkmenistanyň Demokratik partiýasynyň welaýat komitetiniň Hormat hatlarydyr sowgatlary bilen sylaglandy. Bäsleşige gatnaşan ildeşlerimiziň birnäçesine höweslendiriji baýraklar gowşuryldy.