Baharyň gelmegi bilen ak şäherimiz Aşgabadyň keşbi gaýtalanmajak gözellige eýe bolýar. Paýtagtymyzyň ýazyň al-elwan güllerine beslenen owadan görki, tämiz seýilgähleri, nurana gündizleridir müň dürli öwüşgin atýan şuglazar gijeleri ynsan kalbyny päklige besleýär. Gözel görkli paýtagtymyz mermer binalary, lowurdap duran köşgi-eýwanlary, belent ymaratlary, giň we ýagty şaýollary, özboluşly şäher gurluşy bilen göreni haýrana goýýar.

Gojaman Köpetdagy etekläp oturan paýtagtymyzyň töwereginde döredilen tokaý zolaklary baş şäherimiziň ekologiýa we howa şertlerini gowulandyryp, aýratyn gözellik eçilýär. Ýaz pasly tebigatda dynç almagyň, gezelenç etmegiň döwrüdir. Nurana gündizlerde, aý-aýdyň agşamlarda Aşgabadyň söwda we dynç alyş merkezleri, seýilgähleri paýtagtymyzyň ýaşaýjylarynyň we myhmanlarynyň söýgüli ýerlerine öwrülýär. Paýtagtymyzyň eteginde gür baglyga, ter ýaz güllerine bürenip oturan Saglyk ýoly, köpsanly seýilgähler tebigatda, arassa howada dynç almak isleýänleriň arzyly ýerleri. Bu ýerlerde gözel tebigatymyzyň, ak mermerli paýtagtymyzyň ajaýyp görnüşine syn etmek has gyzykly. Ýaz paslynyň jana şypaly howasynda tebigatda welosipedli gezelenç etmek hem özboluşly lezzet berýär. Dürli ýaz gülleri, ter ýaprakly baglar şäherimiziň gözelligi bilen birleşip, bitewi sazlaşygy döredýär. Bu gözellik göni we giň şaýollaryň, ajaýyp ýanýodalaryň ugry bilen barýan her bir adamyň ruhuny belende göterip, şähdini açýar. Hormatly Prezidentimiziň ýaşamak, işlemek, dynç almak üçin döredip berýän döwrebap şertlerinden ruhlanyp, mähriban halkymyz gurýar, döredýär, şöhratly geljege tarap öňe barýar. Şeýle bagtyýar zamanany peşgeş berýän Gahryman Arkadagymyza, Arkadagly Serdarymyza halkymyzyň alkyşly sözleri belentden ýaňlanýar.