Il içinde: «Ýeke-täk zatlaryň ählisi-de mukaddesdir» diýilýär. Şonuň üçin şol mukaddeslikler dünýäniň söýgüsine, hormatyna mynasyp bolýar. «Şol mukaddeslikleriň iň naýbaşysy Watandyr, enedir» diýen sözler bolsa kalbymyzyň töründen hemişelik orun alandyr. Bu, hakykatdanam, şeýle. Ene Ýer ýüzünde beýik söýgä, hormata, mertebä mynasyp bolýan iň mähriban ynsan. Akyldarlaryň biriniň aýdyşy ýaly, adamzatda bar bolan ähli ajaýyplyklar Günüň altyn nurundan, enäniň mährinden kemala gelýärmiş. Watanymyzyň ata, göbek ganymyzyň siňen topragymyzyň enä deňelmegi, belki, şondandyr.
Gowy saz ýa-da aýdym diňläniňde, göwnüň ganatlanýar. Ýürege ýakyn eser okanyňda bolsa, kalbyň has-da baýlaşýar. Eser ýürekden ýazylanda ol ruhy iýmit bolup, ýüreklere ýetýär. Biziň döredijilige uly itergi berýän, köňüllere ylham berýän bagtyýar döwrümiz bar. Kitaba, çeper söze, sungata sarpa goýýan Gahryman Arkadagymyz, hormatly Prezidentimiz Arkadagly Gahryman Serdarymyz bar. Okanyňda ähli köňüllere mähir paýlaýan, Gahryman Arkadagymyzyň paýhasyndan dörän «Enä tagzym — mukaddeslige tagzym» atly ajaýyp kitap her birimiziň kalbymyzda eziz enelerimize bolan çäksiz söýgini, hormat-sarpany janlandyryp, şol mähribanlyga bolan çäksiz mähir-muhabbeti has belentliklere göterýär. «Biziň bagtyýarlygymyz eziz eneleriň arzuwydyr. Biziň arzuwymyz bolsa eneleriň bagtyýar bolmagydyr» diýýän Gahryman Arkadagymyz bu eserinde ene baradaky köňül garaýyşlaryny, taglymatlaryny juda sünnälik bilen teswirleýär. Kitaby eliňe alyp, onuň gatlaryny agdaryp başlanyňdan, seni täsin duýgular, hemmelere ýakyn bolan ahwallar gurşap alýar. Balasy üçin durmuş synaglaryna mertlerçe döz gelmäge kaýyl eneler baradaky kalbyňa ýol salýan söhbetler bütin dünýäňi gurşap alýar. Elbetde, ömrüni, ykbalyny, ýaşlygyny, gojalygyny balasyna bagyşlaýan şol mähribanlar bolsa eziz käbelerimizdir. Gahryman Arkadagymyzyň mähriban käbesi bilen bagly: «Ejem janyň hemişe gepleýşi örän mylakatly hem özüneçekiji bolanlygy üçinmi, nämemi, biz ondan üýtgeşik mähribanlygy aňýardyk. Ýüregi bilen bizi ezizleýändigine, janyndan jan berýän mähribandygyna düşünýärdik. Ol: «Siz meniň guwanjym, ganatymsyňyz!» diýýärdi» diýen jümläni okanyňda, dünýädäki iň mukaddes barlyga — mähriban enelere bolan hormatyň, sarpaň ýene bir gezek artýar.
