Ynsan saglygyny goramak, adamlaryň ömür dowamlylygyny uzaltmak döwlet syýasatymyzda esasy ugurlaryň hatarynda durýar. Çünki Konstitusiýamyzda jemgyýetiň we döwletiň iň ýokary gymmatlygynyň adamdygy bellenilýär. Şoňa görä-de, döwletimizde ilatymyzyň saglygyny goramak, ýaşaýyş-durmuş şertlerini gowulandyrmak, saglygy goraýyş we derman senagaty ulgamyny düýpli kämilleşdirmek babatda giň gerimli we tutumly işler amala aşyrylýar. «Saglyk» Döwlet maksatnamasyna laýyklykda, saglygy goraýyş ulgamyny ösdürmek we halkara ölçeglere laýyk getirmek babatda düýpli özgertmeler durmuşa geçirildi. Netijede, ýurdumyzyň saglygy goraýyş we derman senagaty ulgamynda uly we täze sepgitlere ýetildi. Paýtagtymyzda, welaýat merkezlerinde öňdebaryjy innowasion tehnologiýalar ornaşdyrylan saglyk merkezleri, şypahanalar, ýöriteleşdirilen hassahanalar, derman senagaty kärhanalary, sport desgalary yzygiderli gurlup ulanmaga berilýär. Ýurdumyzda ilata edilýän lukmançylyk hyzmatlarynyň netijeliligi, hili we elýeterliligi ýokarlandyrylýar.

Ösüp gelýän ýaş nesliň saglygy baradaky hemmetaraplaýyn alada biziň baş maksadymyz bolup durýar. Çünki «Sagdyn nesil — sagdyn jemgyýet» diýlişi ýaly, diňe sagdyn jemgyýet kämil ösüşlere ýetip biler. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy bu ugurda belent ynsanperwerligiň nusgasydyr. Şu ýylyň 30-njy sentýabrynda «Türkmenistanyň «Arkadag» medalyny döretmek hakynda» Türkmenistanyň Kanuny kabul edildi. Bu adam bähbitlerini ileri tutmak, olaryň mertebesini belende götermek bilen, adamkärçilik, ýokary ahlaklylyk, haýyr-sahawatlylyk, hemaýata mätäçlere kömek bermek ýaly türkmeniň ata-baba ýol-ýörelgelerine laýyklykda we meýletinlik esasda döredilen haýyr-sahawat gaznasynyň ynsanperwer başlangyçlaryny goldamak, bitiren hyzmatlaryny hormatlamak, bu ugurda görnükli işleri bitiren adamlary sarpalamak maksady bilen döredilen döwlet sylagydyr. Bu ynsanperwer başlangyç her bir adamy haýyr-sahawat işlerine ruhlandyrýar.