26-njy martda Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň howandarlyk etmeginde mekdep okuwçylarynyň arasynda matematika dersi boýunça halkara olimpiadanyň açylyş dabarasy uly ruhubelentlige beslendi. Halkara derejeli bäsleşik Russiýa Federasiýasyndan, Hytaý Halk Respublikasyndan, Eýran Yslam Respublikasyndan, Katar Döwletinden, Azerbaýjan, Belarus, Bolgariýa, Gazagystan, Özbegistan, Täjigistan, Türkiýe Respublikalaryndan hem-de ýurdumyzdan bu halkara olimpiada gatnaşýan okuwçylaryň ençemesini bir ýere jemledi.

Arkadag şäherindäki 1-nji ýöriteleşdirilen okuw-terbiýeçilik toplumynda geçirilen dabarada daşary ýurtly myhmanlar halkymyzyň ajaýyp myhmansöýerlik däplerine laýyklykda garşylanyldy. Bu ýere ýygnananlar ýurdumyzyň mekdep okuwçylarynyň dürli ýyllardaky halkara bäsleşiklerde gazanan üstünlikleri we taslama-döredijilik işleri, çagalar çeperçilik mekdepleriniň okuwçylarynyň çeken suratlary, kitap sergisi bilen tanyşmaga hem mümkinçilik aldylar. Açylyş dabarasynda çykyş edenler Gahryman Arkadagymyzyň, hormatly Prezidentimiziň taýsyz tagallalary bilen ýurdumyzda ýaş nesilleriň döwrebap bilim almaklary, öz zehin-başarnyklaryny açyp görkezmekleri üçin döredilýän giň gerimli mümkinçilikler hakynda gürrüň etdiler we matematika dersi boýunça halkara olimpiada gatnaşyjy okuwçylara üstünlikleri arzuw etdiler.