Ýurdumyzyň zenan türgenleri paýtagtymyzda geçirilen Kuraş boýunça dünýä çempionatynda ajaýyp netijeleri gazandylar. Olar çempionatda üstünlikli çykyş edip, altyn medallaryň üçüsine, kümüş medallaryň dördüsine we bir bürünç medala mynasyp boldular.

Olimpiýa şäherçesindäki Başa-baş söweş sungaty sport toplumynda geçirilen dünýä çempionatynda zenan türgenlerimizden 63 kilograma çenli agram derejesinde Türkmenabat şäherindäki 10-njy sport mekdebiniň tälimçisi Dinara Rozykulowa, 70 kilograma çenli agram derejesinde Dänew etrabyndaky 1-nji sport mekdebiniň tälimçisi Mariýa Lohowa we 87 kilograma çenli agram derejesinde Türkmenabat şäherindäki 29-njy orta mekdebiň 11-nji synp okuwçysy Sabina Kadyrowa dagylar altyn medallaryň eýesi boldular.