«Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara ylmy-maslahatyň çäginde saglygy goraýyş ulgamyndaky dünýä tejribesine esaslanan halkara duşuşyklaryň birnäçesi geçirildi.

Halkara çärelere Russiýa Federasiýasyndan, Gazagystandan, Özbegistan Respublikasyndan, Türkiýe döwletinden, Hindistandan, Hytaý Halk Respublikasyndan, Germaniýa Federatiw Respublikasyndan, Azerbaýjandan gelen lukmanlar, professorlar, ýurdumyzyň saglygy goraýyş işgärleri, Myrat Garryýew adyndaky Türkmenistanyň Döwlet lukmançylyk uniwersitetiniň mugallymlary, alymlary gatnaşdylar. Ylmy maslahat degişli temalar boýunça bölümçelere bölünip, Kardiologiýa ylmy-kliniki merkezli hassahanada, Ýokanç keselleri merkezleri müdiriýetinde, Jemgyýetçilik saglygy we iýmit merkezinde, Arkadag şäheriniň saglyk öýünde we köpugurly hassahanasynda, Enäniň we çaganyň saglygyny goraýyş ylmy-kliniki merkezinde, Gaýragoýulmasyz tiz kömek merkezinde, Myrat Garryýew adyndaky Türkmenistanyň Döwlet lukmançylyk uniwersitetinde geçirilen ylmy maslahatlarda lukmançylyk ugrundan täze ylmy açyşlar, dürli keselleriň bejergisindäki iň kämil döwrebap usullar hem-de olary hünärmenleriň iş tejribesine ornaşdyrmagyň ugur-ýollary hem-de häzirki zaman lukmançylygynyň beýleki derwaýys meseleleri barada pikir alyşdylar.