Täze taryhy döwürde milli Liderimiziň başlangyçlary netijesinde, daşky gurşawy goramak, tebigatdan netijeli peýdalanmak, biodürlüligi gorap saklamak ýurdumyzyň döwlet syýasatynyň ileri tutulýan ugurlarynyň birine öwrüldi. Ata Watanymyzy bagy-bossanlyga öwürmek, şonuň netijesinde howanyň hapalanmagynyň öňüni almak milli Liderimiz tarapyndan ýurdumyzy ykdysady-durmuş taýdan durnukly ösdürmegiň esasy şertleriniň biri hökmünde öňe çykdy. Bu işlerde ýurdumyzda Garaşsyzlyk ýyllarynda gazanylan ýokary tejribe, barha giňden ornaşdyrylýan innowasion tehnologiýalar we milli däpler esas edinilip alynýar.
Bereketli türkmen topragynyň her bir künjegi örän aýawly çemeleşilmäge, goralyp saklanmaga we baýlaşdyrylmaga mynasypdyr. Halkymyza ekologiýa taýdan arassa şertleri üpjün etmek, tebigy baýlyklardan rejeli peýdalanmak ýurdumyzda durmuşa geçirilýän döwlet ekologiýa syýasatynyň esasy maksatlaryny emele getirýär.
