Daş-töweregimizi gurşap alan tebigat biziň ählumumy öýümizdir. Ýaşaýşyň çeşmesi hasaplanylýan tebigat bilen ysnyşykly we sazlaşykly durmuşy alyp barmak biziň her birimiziň mukaddes borjumyz. Hut şonuň üçinem daşky gurşawy arassa saklamak, ony goramak, tebigy baýlyklary aýawly we rejeli peýdalanmak meselesi halkymyzyň durmuş ýörelgesine çuňňur ornaşypdyr. Hormatly Prezidentimiziň taýsyz tagallalary bilen bagtyýarlyk zamanamyzda tutuş adamzat bähbitli bu meseleler inçeden seljerilip, oňyn çözgütlere eýe bolýar. Ýurdumyzyň bu ugurdaky tagallalary we dünýä jemgyýetçiligindäki syýasy işjeňligi dogrusynda ýakynda Saýat etrabynyň Sakar şäher medeniýet öýünde geçirilen çärede täsirli gürrüňler edildi.
Türkmenistanyň Agrar partiýasynyň welaýat we Saýat etrap komitetleriniň, Türkmenistanyň Tebigaty goramak jemgyýetiniň welaýat bölüminiň bilelikde guramaklarynda geçirilen bu çärä jemgyýetçilik guramalarynyň wekilleri, etrabyň edara-kärhanalarynyň işgärleri we ýaşlar gatnaşdylar. «Ekologiýa abadançylygy ― ömrümiziň rahatlygy» ady bilen geçirilen çäräniň dowamynda ene ýere aýawly çemeleşmek, tebigatyň ösümlik we haýwanat dünýäsini baýlaşdyrmak, howanyň hapalanmagynyň öňüni almak ýaly möhüm meseleler dogrusynda pikir alşyldy. Türkmenistanyň Tebigaty goramak jemgyýetiniň wekilleri öz çykyşlarynda bu meseleler boýunça ýaşlaryň garaýyşlaryny çuňlaşdyrmagyň, olaryň ülkämizi bagy-bossanlyga, gül-gülzarlyga öwürmek işlerine işjeň gatnaşmaklaryny ýola goýmagyň hemmämiziň öňümizde möhüm wezipe bolup durýandygyny bellediler.
