Balkanabat şäheriniň Hazar şäherçesindäki «Gara Altyn» çagalar we sagaldyş dynç alyş merkezinde «Zemine ýaň salsyn çaga gülküsi» atly bäsleşik geçirdik. Çagalaryň tomusky dynç alyş möwsümini şadyýan geçirmeklerini we olaryň medeni-köpçülikleýin çärelere işjeň gatnaşmaklaryny gazanmak maksady bilen geçirilen bäsleşige şol ýerde dynç alýan mekdep okuwçylary toparlaýyn gatnaşdylar. Olar goşgy okamakda, aýdym aýtmakda, tans etmekde bäsleşdiler. Şowhunly geçen bäsleşikde öz deň-duşlaryndan tapawutlanyp, ýeňiji bolmagy başaran çagalara ýadygärlik sowgatlar gowşuryldy.