Mukaddes Garaşsyzlygymyzyň halkymyza eçilýän bagtyýarlygynyň saýasynda sahawatlylygyň, agzybirligiň we jebisligiň nuruny dünýä dolduryp, Gurban baýramy dowam edýär. Berkarar döwletiň täze eýýamynyň Galkynyşy döwrüniň beýik tutumlaryna, ýeten belent sepgitlerine buýsanýan il-ulsumyzyň uludan-kiçä hemmesiniň gözlerinde şatlyk alamaty uçganaklaýar. Çünki Gurban baýramynda ildeşlerimize naz-nygmatly baýramçylyk saçagynyň başynda didarlaşmaga, birek-biregiňkä myhmançylyga barmaga, baýramçylyk bilen gutlamaga pursat döreýär. Päk ýürekden çykýan ajaýyp arzuwlar bolsa gursaklara dolup, halkymyzyň kalbynda buýsanç duýgularyny oýarýar. Kalby sahawatdan, belent ynsanperwerlikden doly Milli Liderimiziň, Arkadagly Gahryman Serdarymyzyň tagallalary bilen bu mukaddes baýramyň üç günläp deňli-derejeli bellenilmegi halkymyzyň başyny gök diredýär.
«Imanym ýoldaş bolsa, barsam, Käbäni görsem» diýlen sözler «Pähim-paýhas ummany Magtymguly Pyragy» ýylynda doglan gününiň 300 ýyllygy halkara derejesinde bellenilýän Magtymguly atamyzyň däl, eýsem, külli türkmeniň baş arzuwydyr. Gurban baýramynyň öňüsyrasynda hormatly Prezidentimiziň Permanyna laýyklykda, Türkmenistandan zyýaratçylaryň Mekgä we Medinä haj parzyny berjaý etmek üçin ugradylmagy döwletimiziň ata-babalarymyzyň ynsanperwer ruhy-ahlak ýörelgelerinine ygrarlydygyna aýdyň şaýatlyk edýär. Gurban baýramy musulmanlaryň keramatly Mekgä zyýaratynyň — Hajyň soňky güni başlanýar. Hajyň ähli dessurlaryny berjaý eden zyýaratçylar öňden dowam edip gelýän kadalara laýyklykda Allanyň ýoluna gurban bermegi amal edýärler.
