Soňky ýyllarda durmuşymyza giňden ornaşan ekranlar – telewizor, kompýuter, planşet, telefon kitap okamak endigimize öz täsirini ýetirýär. Elektron kitaphanalaryň hem-de elektron neşirleriň bardygyna garamazdan, kagyz kitaby okamagyň lezzeti başgaça. Okamak dünýä akyl ýetirmäge, kämilleşmäge we pikirleriňi täzelemäge ýol açýar. Kitap okamagy yzygiderli ýola goýmak kyn endikleriň biri bolsa-da, bilermenler kitap bilen dostlaşmagyň aňsat usullaryny salgy berýärler.
Maksat goýmak. Ilki bilen halaýan ýazyjylaryň kitaplarynyň sanawyny düzüp, her ýyl şunça kitap okaryn diýip öz öňüňde maksat goýmaly. Ilkibaşda kyn ýaly bolup görünse-de, kitaplaryň tagamyny dadyp başlanyňyzdan soň, maksadyňyza çalt ýetersiňiz. Hatda sanawdakydan daşgary kitaplary hem okap bilersiňiz. Okamaly kitaplaryňyzyň sanawyny hepdelik ýa-da bir aýlyk düzseňiz ýadamarsyňyz. Mundan başga-da, her gün 20 minut okamak, her hepde 50 sahypa okamak, her aý 2 roman okamak ýaly meýilnamalary hem goşup bilersiňiz.