Ýertudana adam bedeni üçin zerur bolan miweleriň biridir. Ol dartgynly ýagdaýlarda köşeşmäge, immuniteti güýçlendirmäge we gan aýlanyşyny gowulandyrmaga ýardam edýär. Bu miwäniň özboluşly tagamy hiç kimi biparh goýmaýar.
Ýertudana bägülgüllüler maşgalasyna degişli bolan köpýyllyk ösümlik bolup, iýilýän görnüşi ilkinji gezek XV asyrlarda peýda bolýar. Ata Watany Demirgazyk Amerika hasaplanýan bu miwe birnäçe asyrdan soňra medeniýetleşdirilip, täze görnüşleri peýda bolýar. Ýertudananyň düzüminde köp sanly peýdaly maddalar we ýokumly serişdeler saklanýar. Miwäniň ýerde bitýän bu görnüşi maý-iýun aýlarynda ýetişýär. Çigidi daşynda ýerleşýän bu miwäniň Ýer ýüzünde 600 töweregi (ak, gülgün, gyzyl, sary, altynsow reňkli) görnüşi bar.