Tokionyň Haneda howa menzili dünýäniň 570 howa menziliniň arasynda arassalyk babatda öňdeligi eýeledi. Bu barada Londondaky dünýäniň awiakompaniýalarynyň we howa menzilleriniň işine baha berýän «Skytrax World Airport Awards» merkeziniň sanawynda mälim edilýär. Ýolagçylaryň beren bahalary esasynda düzülen sanawda Haneda howa menziliniň arassaçylyk babatda öwgä mynasypdygy belli boldy. Bu bolsa pandemiýadan soň, arassaçylygyň iň möhüm talaplaryň birine öwrülen döwründe aýratyn ähmiýete eýedir. Haneda howa menzilinden başga-da, Ýaponiýanyň Nagoýa (5-nji orun), Narita (6-njy orun) we Kansaý (7-nji orun) ýaly ýene 3 howa menzili ilkinji onluga girdi.
Sanawda Ýaponiýadan başga-da Aziýanyň howa menzilleri göze ilýär. Seulyň Inçhon howa menzili ikinji orny eýeledi, ondan soň Singapuryň Çangi howa menzili, Dohanyň Hamad howa menzili bar. Sýurih howa menzili 10-njy orny eýeläp, Ýewropanyň ilkinji onluga giren ýeke-täk howa menzili boldy.
