14-nji maýda Türkmenistanyň Jemgyýetçilik guramalarynyň merkezinde «Magtymguly Pyragy — köňülleriň çyragy» atly döredijilik bäsleşiginiň ýeňijilerini sylaglamak dabarasy boldy. Ony Türkmenistanyň Magtymguly adyndaky Ýaşlar guramasynyň Merkezi Geňeşi we «Güneş» žurnalynyň redaksiýasy bilelikde guradylar. Ýurdumyzyň umumybilim berýän orta mekdepleriniň okuwçylarynyň arasynda yglan edilen bäsleşik düzme we hekaýa ýazmak, surat çekmek ugurlaryny öz içine aldy. Oňa paýtagtymyzyň, Arkadag şäheriniň, ýurdumyzyň welaýatlarynyň mekdep okuwçylarynyň ýüzlerçesi öz işleri bilen gatnaşdylar.
Türkmenistanyň Jemgyýetçilik guramalarynyň merkeziniň giň eýwanynda mekdep okuwçylarynyň bu bäsleşige hödürlän, ýagny, akyldar şahyrymyz Magtymguly Pyragynyň ömrüne, döredijiligine bagyşlap çeken suratlary sergi görnüşinde ýaýbaňlandyryldy. Okuwçylaryň bu döredijilik işlerinde ösüp gelýän ýaş nesillerimiziň ukyp-başarnyklaryny, zehinlerini aýdyň görmek boldy.
