Magtymguly Pyragynyň doglan gününiň 300 ýyllygy mynasybetli welaýat maliýe-ykdysady orta hünär okuw mekdebinde çeper okaýyş bäsleşigini geçirdik. «Magtymguly, sözlär tili türkmeniň» diýen at bilen geçirilen bu bäsleşige Türkmenabat şäherindäki ýörite orta hünär okuw mekdepleriniň talyplary gatnaşdylar.
Talyplar berlen şertler boýunça dana şahyrymyz Magtymguly Pyragynyň şygyrlar bossanyndan goşgulary labyzly okamak we saz bezegi bilen ýatdan aýtmak boýunça bäsleşdiler. Şeýle-de olar akyldar şahyrymyzyň ömri we döredijiligi bilen baglanyşykly sahna eserlerini ýerine ýetirdiler. Çykyşlara çeper okaýşyň we sahna ussatlygynyň talaplarynyň ýerine ýetirilişi boýunça baha berildi we ýeňijiler kesgitlenildi. Bäsleşigiň netijeleri boýunça welaýat maliýe-ykdysady orta hünär okuw mekdebiniň talyby Maksat Myradow baş baýraga mynasyp boldy. Welaýat ýörite sungat mekdebiniň talyby Ata Gaýypow birinji, ýene-de şol mekdebiň talyby Gözel Eşgeldiýewa we Türkmenabat şäherindäki tehniki orta hünär okuw mekdebiniň talyby Gadam Eýeberdiýew ikinji baýrakly orny eýelediler. Türkmenabadyň lukmançylyk orta okuw mekdebinden Kemal Akmamedow we Türkmenabat şäherindäki derýaçylyk orta hünär okuw mekdebinden Laçyn Öwezmyradowa bäsleşigiň üçünji baýrakly ornuna mynasyp boldular. Ýeňijiler welaýat birleşmämiziň adyndan ýadygärlik sowgatlary bilen sylaglanyldy.
