Woleýbol boýunça Ýewropanyň Çempionlar Ligasy ýaryşlarynyň ikisinde-de, ýagny erkekleriň hem-de zenanlaryň arasynda italýan klublary çempionlyk gazandy. Iki ýaryşyň hem final duşuşyklary Türkiýäniň Antalýa şäherinde geçirildi.
Erkekleriň arasyndaky finalda Italiýanyň «Itas Trentino» topary bilen Polşanyň «Ýastşembskiý Wengel» topary duşuşdy. Italýan kluby 3:0 (25:20, 25:22, 25:21) hasabynda üstün çykyp, 13 ýyldan soň 4-nji gezek çempion diýen ady eýeledi. Trento şäheriniň wekili mundan öň 2009-njy, 2010-njy we 2011-nji ýyllarda yzly-yzyna 3 gezek çempionlyk gazanypdy. Polşanyň «Ýastşembskiý Wengel» topary bolsa bassyr 2-nji sapar finalda ýeňildi.