Şu gün — 21-nji fewralda Türkmenistanyň Jemgyýetçilik guramalarynyň merkezi binasynda Türkmenistanyň Zenanlar birleşiginiň Merkezi Geňeşiniň hem-de Türkmenistanyň Kärdeşler arkalaşyklarynyň Milli merkeziniň hormatly Prezidentimiziň halkymyza sowgat eden «Ýaşlar — Watanyň daýanjy» atly ilkinji kitaby esasynda ýurdumyzda eşretli günleriň hözirini görüp ýaşaýan bagtyýar zenanlaryň arasynda yglan eden «Ýaş türkmen zenanlary — Berkarar döwletiň mertebe tugy» atly bäsleşigiň jemleýji tapgyry boldy. Onda bäsleşigiň Aşgabat, Arkadag şäherlerinde we welaýat tapgyrlarynda ýeňiji bolan bagtyýar zenanlar özara bäsleşdiler.
Hormatly Prezidentimiz ýaş nesilleriň ylymly-bilimli, giň-gözýetimli bolup, milli ýol-ýörelgelerimiz esasynda terbiýelenmelidigini aýratyn belleýär. Döwlet Baştutanymyzyň «Ýaşlar — Watanyň daýanjy» atly ajaýyp kitabynda türkmen ýaşlarynyň üstünlikli menzilleri, zenanlaryň maşgalada eýeleýän orny, milli däp-dessurlarymyz, ene-mamalarymyzyň çeper el hünäri giň beýanyny tapýar.
