Mukaddes Garaşsyzlygymyzyň 33 ýyllyk şanly baýramynyň bosagasynda Türkmenistanyň Döwlet migrasiýa gullugynyň Ahal welaýaty boýunça müdirliginiň Sarahs etrap bölüminiň durky täzelenen döwrebap binasynyň dabaraly ýagdaýda açylyp ulanylmaga berilmegi ajaýyp toý sowgady boldy. Dabara harby gullukçylardan başga-da il sylagly ýaşulular, kümüş saçly eneler, jemgyýetçilik guramalarynyň wekilleri gatnaşdylar.
Döwrebap binanyň açylyş dabarasynda Türkmenistanyň Döwlet migrasiýa gullugynyň başlygynyň orunbasary Döwran Baýramow, gullugyň Ahal welaýaty boýunça müdirliginiň harby gullukçysy, maýor Tirkiş Şiralyýew, Sarahs etrabyndan ýaşuly nesliň wekili Rejep Amangylyjow we beýlekiler çykyş edip, şatlykly waka mynasybetli ol ýere ýygnananlary gutladylar. Olar çykyşlarynda Arkadagly Gahryman Serdarymyzyň halkymyzyň, şol sanda harby gullukçylaryň we olaryň maşgala agzalarynyň bagtyýar durmuşda ýaşamagyny üpjün etmekde döredýän giň we amatly şertlerine özleriniň hoşallyklaryny beýan etdiler.
