Hormatly Prezidentimiziň parasatly baştutanlygynda Türkmenistanyň dünýä döwletleri, aýratyn hem goňşy ýurtlar bilen alyp barýan hoşniýetli, goňşuçylyk, özara bähbitli gatnaşyklary täze derejä çykýar. Muny şu ýylyň 24 — 25-nji oktýabrynda Gazagystan Respublikasynyň Prezidenti Kasym-Žomart Tokaýewiň ýurdumyza bolan döwlet sapary hem aýdyňlygy bilen görkezdi. Gazagystanyň Prezidentiniň ýurdumyza bolan bu döwlet sapary hoşniýetli goňşuçylyga esaslanýan türkmen-gazak gatnaşyklarynyň täze taryhyna nobatdaky möhüm sahypany ýazdy.

Häzirki döwürde «Türkmenistanyň daşary syýasat ugrunyň 2017 — 2023-nji ýyllar üçin konsepsiýasyny» amala aşyrmak babatynda ýurdumyz Gazagystan Respublikasy bilen gatnaşyklary hil taýdan ýokary derejelere çykarýar we ony täze many-mazmun bilen baýlaşdyrýar. Bu gatnaşyklar ynanyşmagyň, birek-birege hormat goýmagyň, düşünişmegiň, özara bähbitliligiň mizemez esaslarynda alnyp barylýar. Bu bolsa, ilkinji nobatda, halklaryň taryhy umumylygyndan, ynsanperwer-ruhy köklerden, iki doganlyk halkyň medeniýetde, söwdada köpasyrlyk özara bähbitli gatnaşyklaryndan, şeýle hem parahatçylyga, ylalaşyga, durnukly ösüşe gönükdirilen umumadamzat gymmatlyklaryndan ugur alýar.