Toýlarymyzyň bezegi gamyşgulak bedewlerimiz diňe bir ýyndamlykda, gözellikde özüni tanatman, ynsan saglygy üçin hem peýdalydyr. At münmek arkaly saglygy bejermeklige ippoterapiýa diýilýär. Ippoterapiýanyň adam bedenine diňe bir fiziki taýdan däl-de, ruhy, bejeriş-dikeldiş täsiri hem has ýokarydyr. Ippoterapiýa esasan hem oňurga gyşarmalarynda, hereket sazlaşygynyň bozulmalarynda, myşsalaryň tutgaýly ýygrylmalarynda, şeýle-de, hirurgiki operasiýalardan soň hereketlenmek ukybyny dikeltmek üçin peýdalydyr.

At münmek göwräni dik tutmaga, syratly bolmaga, fiziki we psihiki agrama hötde gelmäge, öz-özüňe baha bermek ukybyna, özüňi arkaýyn duýmaga, işjeň, ünsli bolmaga, gaharjaňlykdan, gyzmalykdan dynmaga hemaýat berýär.