Ysmanak ýurdumyzda dermanlyk ösümlikleriň arasynda iň köp duş gelýän görnüşleriniň biridir. Ol bir ýyllyk otjumak ösümlik bolup, onuň ýabany we bakja görnüşi bar. Ýabany ysmanak ýaz paslynda dag eteklerinde tebigy ýagdaýda gögerýär. Bakja görnüşi ýörite ekilýär. Ysmanak dürli witaminlere baý dermanlyk ösümlikdir. Şonuň üçin fransuzlar ysmanaga «gök önümleriň şasy» diýen ady beripdirler. Bu dermanlyk ösümliginiň düzüminde С, A, РР, К, E, D witaminleri hem-de B witaminler toplumy bar. Düzümi demre baý bolansoň, ganyň gemoglobinini kadalaşdyrýar. Munuň netijesinde, beden agzalarynyň kislorod bilen üpjünçiligi gowulaşýar.