Ýakynda Türkmenistanyň Goranmak ministrliginiň podpolkownik Döwran Geldiýewiň serkerdelik edýän welaýat raýat goranyşy we halas ediş işleri müdirliginiň şahsy düzüminiň, welaýat, şäher, etrap häkimleriniň orunbasarlarynyň gatnaşmaklarynda okuw-usuly maslahaty geçirildi. Eýeçiligiň görnüşine garamazdan edaralaryň hem-de raýat goranyşynyň birikmeleriniň ýolbaşçylarynyň we hünärmenleriniň, ilatyň raýat goranyşy boýunça okadylmagy hökmany hasaplanylýar we ol ýeke-täk ulgam boýunça amala aşyrylýar. Raýat goranyşy boýunça taýýarlamak we gaýtadan taýýarlamak Türkmenistanyň Goranmak ministrliginiň Baş raýat goranyşy we halas ediş işleri müdirliginiň okuw-usulyýet merkezinde, Baş müdirligiň ýerlerdäki birliklerinde, raýatlaryň işleýän, okaýan we ýaşaýan ýerlerinde geçirilýär. Okuwlar tapgyrlaýyn okuwlar, türgenleşikler, wagyz-nesihat işleri, şeýle hem köpçülikleýin habar beriş serişdeleri arkaly amala aşyrylýar. Şu nukdaýnazardan, maýor Nurgylyç Ýarjanowyň, kapitan Jumamyrat Hudaýberdiýewiň guran sapaklary okuw-usuly maslahata gatnaşanlarda ýatdan çykmajak täsirleri galdyrdy.