Berkarar döwletimiziň bagtyýarlyk döwründe ilatymyzyň saglygyny goramak, sagdyn durmuş ýörelgelerini berjaý etmek, keselleriň öňüni almak, ömrüň dowamlylygyny uzaltmak boýunça durmuşa geçirilýän işler giň gerime eýe bolýar. Sagdyn iýmitlenmegiň ählumumy kadalary we ýörelgeleri berjaý edilip, netijeli işleriň esasynda ilatyň saglygy pugtalandyrylýar. Bu möhüm çäreler nädogry iýmitlenmek bilen ýüze çykýan keselleriň ýaýramagynyň öňüni almaga ýardam berýär.

Her bir adam kadaly iýmitlenmek boýunça zerur bolan ýönekeý düzgünleri dogry berjaý etmäge çalyşmalydyr. Iýmitler kadaly ýagdaýda saklanmalydyr, gök we bakja önümlerinden peýdalanmalydyr. Lukmanlar sagdyn iýmitlenmegiň kadalaryny düşündirýärler. Günüň dowamynda dört-bäş gezek dürli naharlardan az-azdan naharlanmak we ter gök önümlerden taýýarlanan şerbetleri içmek saglyga ýaramlydyr. Bedeniň berk, sazlaşykly ösmegine süýt we süýt önümleri, et, balyk, ýumurtga, gök we däne önümleri oňyn täsir edýär. Witaminlere baý bolan bagyr, balyk we ýumurtga önümleri adam bedenine ýokumlydyr. Eger-de bedene gerek mukdardaky witaminler we minerallar doly derejede barmasa, onda dürli keselleriň ýüze çykmagy mümkin. Şonuň üçin gündelik durmuşymyzda sagdyn iýmitlenmegiň ähli düzgünlerini berjaý etmek zerurdyr.