ABŞ-nyň öňki Prezidenti Donald Trampyň aýaly Melaniýa Tramp iki görnüşde terjimehal kitabyny çykarjakdygyny mälim etdi. Bu barada ABŞ-nyň öňki birinji hanymynyň web saýtynda habar berilýär. «Melaniýa» diýlip atlandyryljak bu kitapda şahsy babatda kämillige ýeten, päsgelçilikleri ýeňip geçip, durmuşda öz ýoluny goýan zenanyň güýçli taraplary we ylham beriji başdan geçiren wakalary barada gürrüň berilýär.
«Kitapda özboluşly durmuşda ýaşan öňki birinji hanymyň keşbi bütin aýdyňlygy bilen beýan edilip, okyjylary öz dünýäsine imrindirýär» diýlip, ýatlamalar kitabynyň sözbaşysynda bellenilýär. Kitabyň sahypalarynda ozal hiç ýerde çap edilmedik suratlaryň we ýatlamalaryň boljakdygy habar berilýär.