Düýn paýtagtymyzdaky «Ýyldyz» myhmanhanasynda Demir ýollaryň hyzmatdaşlygy guramasynyň (DÝHG) agza döwletleriniň demir ýol ulaglary edaralarynyň ýolbaşçylarynyň we jogapkär wekilleriniň maslahatynyň XXXVIII mejlisi öz işini tamamlady. Dünýäniň 20-den gowrak ýurdunyň demir ýol we beýleki ugurdaş edaralarynyň wekillerini bir meýdança jemlän Aşgabat forumynyň dowamynda guramanyň degişli düzümleriniň, agza döwletleriniň demir ýol edaralarynyň geçen döwürde alyp baran işlerine seljerme berildi, geljekde olaryň öňünde durýan birnäçe möhüm wezipeleri ýerine ýetirmegiň ugurlary ara alnyp maslahatlaşyldy. Forumyň çäklerinde Türkmenistanyň bu iri düzüme agza bolmagynyň 30 ýyllygy mynasybetli «Türkmendemirýollary» agentligine ýörite taýýarlanan ýadygärlik nyşanynyň gowşurylmagy ýurdumyzyň demir ýol pudagynda gazanan ajaýyp netijelerine, ýeten belent sepgitlerine berlen ýokary bahanyň güwäsine öwrüldi.

Giň wekilçilikli çäräniň jemleýji gününde mejlisiň jemleri boýunça birnäçe degişli resminamalara, şol sanda Demir ýollaryň hyzmatdaşlygy guramasynyň agza döwletleriniň demir ýol ulaglary edaralarynyň ýolbaşçylarynyň we jogapkär wekilleriniň maslahatynyň XXXVIII mejlisiniň Teswirnamasyna gol çekildi. Şonuň bilen birlikde-de, mejlisiň jemleri boýunça gurama agza ýurtlaryň netijeli hyzmatdaşlygy hem-de ynanyşykly gatnaşyklary pugtalandyrmaga gönükdirilen Aşgabat Jarnamasy kabul edildi. Maslahata gatnaşyjylara degişli diplomlar dabaraly ýagdaýda gowşuryldy. Halkara foruma gatnaşyjylar hormatly Prezidentimiz Serdar Berdimuhamedowa Ýüzlenme kabul etdiler.