Gyş pasly sahawatly topragyň kadaly dynç alýan hem-de günsaýyn gurplanýan wagtydyr. Golaýda ýagan gar Daşoguz welaýatynyň ekerançylyk meýdanlaryna ak düşek ýazdy. Munuň özi bereket-bolçulykdan nyşandyr.

Möwsümleýin oba hojalyk işlerini ýokary hilli geçirmek, ýazky ekişe talabalaýyk taýýarlyk görmek babatda öňde goýlan wezipeleri üstünlikli ýerine ýetirmek boýunça möhüm agrotehniki işler alnyp barylýar. «Pähim-paýhas ummany Magtymguly Pyragy» ýylynda welaýat boýunça 140 müň gektar meýdanda gowaça ekişini bellenilen möhletlerde geçirip, 265 müň tonna hasyl almak meýilleşdirilýär.