Ekin ene ýeriň bezegidir, ýaraşygydyr. Olaryň arasynda uly iliň soltany saýylýan bugdaý aýratyn orny eýeleýär. Bugdaý nygmatlaryň naýbaşysy, berekediň gözbaşy hasaplanylýar. Gallanyň bolçulygyny döretmek işine etrabymyzyň ussat ýer eýeleri agzybirlik bilen gatnaşýarlar.

Şu möwsümde etrabymyz boýunça 15,9 müň gektar meýdanda orak geçirilýär. Bu işe kuwwatly kombaýnlaryň 40-sy çekildi. Olaryň güýji bilen her günde ýüzlerçe gektar meýdanda bugdaý orulýar. Etrap «Obahyzmat» önümçilik kärhanasynyň tejribeli kombaýnçylary Begzad Oralow, Narzulla Ýangibaýew dagy her günde 15 — 20 gektar meýdanda orak geçirip, bu işde öz kärdeşlerine görelde bolýarlar. Şeýle gaýratly adamlaryň birleşen tagallalary arkaly altynsow çäjimiz barha belende galýar.