«Türkmenistan — parahatçylygyň we ynanyşmagyň Watany» ýyly, turuwbaşdan, ýurdumyz we tutuş sebit ähmiýetli taryhy wakalara beslenýär. Şeýle wakalar Owganystan Yslam Respublikasynyň Akina — Andhoý beketleriniň arasynda uzynlygy 30 kilometre barabar demir ýoluň, Kerki (Türkmenistan) — Şibirgan (Owganystan) ugry boýunça 500 kilowolt güýji bolan, 153 kilometrlik elektrik geçiriji ulgamyň, Ymamnazar — Akina we Serhetabat — Turgundy halkara optiki-süýümli aragatnaşyk ulgamynyň hem-de «Malaý» käninde täze gaz gysyjy desganyň açylyş dabaralarydyr.

Şu ýylyň 21-nji ýanwarynda paýtagtymyzda Hazar deňzindäki «Dostluk» ýatagynyň uglewodorod serişdelerini bilelikde gözlemek, işläp geçmek we özleşdirmek hakynda Türkmenistanyň Hökümeti bilen Azerbaýjan Respublikasynyň Hökümetiniň arasynda özara düşünişmek hakyndaky Ähtnama gol çekilmegi türkmen-azerbaýjan hyzmatdaşlygynyň taryhyna täze sahypa hökmünde girdi. Bu Ähtnama ýangyç-energetika ulgamynda alnyp barylýan köpýyllyk ikitaraplaýyn gatnaşyklaryň aýdyň netijesidir, özara hyzmatdaşlykda Hazaryň uglewodorod serişdelerini bilelikde özleşdirmek boýunça gazanylan ilkinji hukuk binýadydyr.