2021-nji ýylyň «Türkmenistan — parahatçylygyň we ynanyşmagyň Watany» ýyly diýlip atlandyrylmagy harby gullukçylarda uly buýsanç duýgusyny döretdi. Hormatly Prezidentimiziň parasatly baştutanlygynda ýurdumyzyň beýleki pudaklary bilen bir hatarda Türkmenistanyň Ýaragly Güýçleri hem günsaýyn ösýär we özgerýär. Harby gullukçylaryň ýaşaýyş-durmuş şertlerini has-da gowulandyrmak maksady bilen häzirki wagtda ähli harby bölümlerde sanly ulgam giňden ornaşdyrylýar we bu mümkinçiliklerden harby gullukçylar maksadalaýyk peýdalanýarlar. Şunuň bilen bir hatarda Türkmenistanyň Ýaragly Güýçlerinde terbiýeçilik işleri hakynda Düzgünnamanyň talaplaryna laýyklykda Ýaragly Güýçlerimiziň bölünmelerinde söweşjeň dostlugy we jebisligi pugtalandyrmak, harby düzgün-nyzamy berkitmek hem-de söweşjeň we gumanitar taýýarlygynyň netijeliligini ýokarlandyrmak maksady bilen, çagyryş boýunça harby gullukçylaryň hataryndan düzümden daşary işjeň agzalar saýlanylýar we bellenilýär. Muňa mysal edip, 2021-nji ýylyň 1-nji okuw möwsüminiň başlanmagy mynasybetli geçirilen umumy ýygnakda podpolkownik Bazargeldi Annaniýazowyň ýolbaşçylyk edýän garnizonynyň, podpolkownik Oraz Hudaýberdiýewiň serkerdelik edýän motoatyjylyk batalýonynyň bölünmeleriniň şahsy düzüminiň arasyndan düzümden daşary işjeň agzalaryň bellenilendigini nygtamak bolar.

Düzümden daşary bellenen işjeň agzalara, harby gullugyň gündelik işinde, bölünmede terbiýeçilik işlerini hem-de ahlak-psihologik üpjünçiligi amala aşyrmakda uly orun berilýär. Bu işde bölünmäniň işjeň agzalary bölünme serkerdesiniň terbiýeçilik işleri boýunça orunbasarynyň kömekçileri hasaplanylýar. Işjeň agzalary şahsy düzümiň arasynda dürli temadaky terbiýeçilik agşamlaryny, medeni ýörişleri, köpçülikleýin medeni-sport çärelerini guramak, şeýle hem şahsy düzümiň arasynda harby düzgün-nyzamy pugtalandyrmak boýunça işleri alyp barmakda esasy wezipeleri ýerine ýetirýärler.