Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň taýsyz tagallasy netijesinde ýurdumyz halkara hyzmatdaşlygy yzygiderli ösdürýär. Şu jähetden milli bilim ulgamynyň dünýäniň bilim giňişligine sazlaşykly goşulmagynda dünýä dilleriniň hyzmatyna aýratyn ähmiýet berilýär.

11-nji aprelde Döwletmämmet Azady adyndaky Türkmen milli dünýä dilleri institutynda Türkmenistanyň we daşary ýurtlaryň dil we beýleki ugurly ýokary okuw mekdepleriniň talyplarynyň arasynda iňlis dili boýunça III halkara internet olimpiadasyna (IIOE--2024) badalga berildi. Institutyň resmi internet saýtynda biziň ýurdumyz bilen bir hatarda dünýäniň 41 döwletinden oňa gatnaşyjylar hasaba alyndy. Olaryň hatarynda Russiýa Federasiýasyndan, Hindistan, Özbegistan, Täjigistan, Gazagystan, Türkiýe, Hytaý Halk Respublikasyndan, Günorta Koreýadan, Belarus, Wengriýa we beýleki döwletlerden talyplar gatnaşýarlar.