Türkmen halkynyň Milli Lideri Gahryman Arkadagymyzyň oýlanyşykly, öňdengörüjilikli we asylly başlangyçlary hormatly Prezidentimiziň parasatly baştutanlygynda Berkarar döwletiň täze eýýamynyň Galkynyşy döwrüniň innowasion ösüşine mahsus amala aşyrylýar. Garaşsyz Watanymyzyň ykdysadyýetini döwrebaplaşdyrmakda halkymyzyň milli garaýyşlaryndan, ýerli tebigatymyzyň aýratynlyklaryndan we dünýä tejribesinden ugur alynýar. Hemişelik Bitarap döwletimiziň maksatnamalaýyn we toplumlaýyn häsiýetli ykdysady syýasaty häzirki zaman ylmynyň gazananlaryndan, innowasion tehnologiýalaryndan hemmetaraplaýyn peýdalanmaga, ilatymyzyň ýaşaýyş-durmuş şertlerini yzygiderli ýokarlandyrmaga gönükdirilýär. Türkmenistany tebigy çig maly gaýtadan işleýän iri senagat merkezine, ýokary hilli harytlary öndürýän ýurda öwürmeklik maksat edinilýär. Şunda iri möçberli taslamalaryň, maýa goýumlaryň esasynda ykdysadyýetiň ähli pudaklarynyň özleşdirilmegine, öndürilýän harytlaryň bäsdeşlige ukyplylygynyň ýokarlandyrylmagyna aýratyn üns berilýär. Ata Watanymyzda daşary ýurtlardan getirilýän senagat harytlarynyň ornuny tutýan, ekologiýa taýdan arassa önümleriň öndürilýän görnüşlerini, mukdaryny artdyrmak, milli ykdysadyýetiň eksport mümkinçiliklerini giňeltmek üçin täze kuwwatlyklaryň işe girizilmegine möhüm ähmiýet berilýär. Munuň şeýledigi ýurdumyzda gurlup, ulanylmaga tabşyrylýan durmuş-ykdysady, medeni-ýaşaýyş maksatly desgalaryň mysallarynda aýdyň görünýär.
Şu ýylyň 13-nji martynda döwlet Baştutanymyzyň ak pata bermegi bilen Lebap welaýatynyň Köýtendag etrabynda ýylda 1 million tonna sement öndürmäge niýetlenen Lebap sement zawodynyň ikinji tapgyrynyň dabaraly ýagdaýda açylyp, işe girizilmegi aýdylanlara şaýatlyk edýär. Açylyş dabarasy taryhy waka beslenen iri taslama milli ykdysadyýeti senagatlaşdyrmak boýunça kabul edilýän döwlet maksatnamalarynyň dowamly, netijeli durmuşa geçirilýändigini aýdyň görkezýär. Täze zawodyň Türkmenistanyň Senagatçylar we telekeçiler birleşmesi tarapyndan gurlandygy ýurdumyzyň ykdysadyýetini ösdürmek ugrunda gazanylýan üstünliklere milli işewürlerimiziň işjeň gatnaşýandygyny hem-de uly goşant goşýandygyny dabaralandyrýar. Güneşli Diýarymyzyň senagat-gurluşyk pudaklarynyň önümçilik düzümleriniň üstüni ýetiren kärhananyň dünýäniň ösen ýurtlarynyň halkara ölçeglerine laýyk gelýän tehnologiýalary bilen enjamlaşdyrylandygy Türkmenistanyň halkara ykdysady hyzmatdaşlygynyň öňe ilerleýändigini täze mazmun bilen baýlaşdyrýar. Zawodyň inženerçilik işleriniň meşhur daşary ýurt kompaniýasynyň halkara hil we ekologiýa, daşky gurşaw üçin howpsuzlyk, netijelilik güwänamasyna mynasyp bolandygy ýurdumyzyň alyp barýan durmuş-ykdysady syýasatynyň ählumumy Durnukly ösüş maksatlaryna ýetilmegine, berjaý edýän halkara ekologiýa kadalarynyň umumadamzat bähbitlerine goşant goşýandygynyň ýokary bahasy saýylýar.
