Örän owadan bu gülli ösümligiň dünýäde, takmynan, 100, Türkmenistanda 16 görnüşi duş gelýär. Bu gül Diýarymyzda Günorta-Günbatar Köpetdagda, Merkezi Köpetdagda, Sünt — Hasar daglarynda duşýan endemik hasaplanylýar.
Guguň çigildemi — sowsanlar maşgalasynyň çigildemler urugynyň boýy 15-45 santimetre ýetýän köpýyllyk otjumak wekilidir. Toprakdaky soganlygy süýrümtik ýumurtga şekilli, ýokarsy gysylan, uzynlygy 48-60 millimetr, ini 32-40 millimetrdir. Soganlygynyň gabygy goňur reňkli, perdeli, içi örän gür çal ýa-da agymtyl-çal ak keçe ýaly tüýjagazlar bilen örtülendir. Baldagy güli bilen bilelikde uzynlygy 15-45 santimetr, 4-6 ýaprakly, tas ýalaňaç ýa-da gysga tüýlüjedir.
