Ýerasty kölleriň biri Köýtendag gerşiniň günorta ýapgydynyň Akjar diýen ýerinde ýerleşýär. Ýeriň üsti tegelek şekilde aşak çöküpdir. Onuň çuňlugy 25-30 metr töweregi. Çöketligiň günorta tarapynda ýene-de aşak girip gidilýän gowak bar. Gowagyň agzy uly bolup, uzynlygy 20, ini 15 metr töweregi, beýikligi bolsa 5-6 metrden 30 metre çenli. Gowaga girilýän ýerde ýokarky angidrit gatlakdan gaçan daşlar pytraşyp ýatyr. Atmosfera ygallarynyň köp düşen ýyllary onuň içindäki kölüň suwy gowagyň agzyna çenli gelýär.
Bu köl bilen meniň ilkinji tanyşlygym 1988-nji ýylyň iýun aýlarynda bolup geçdi. Günleriň birinde ýokarda ady agzalan ýerasty kölüň üstünden geldim. Onuň parametrlerini göz çaky bilenräk kesgitledim. Gijesine 60-70 metr uzaklyga ýetýän el çyrasynyň şöhlesi onuň inine zordan ýetýärdi, uzynlygyny bolsa görkezip bilmeýärdi. Şol wagt kölüň suwy azrak ekeni. Men gowagyň içindäki köle barmak üçin 30-40 metr ýol geçmeli boldum. Kölüň çuňlugy we uzynlygy meni gaty gyzyklandyrýardy. 60-70 metrden aňyrsy görünmeýän kölüň uzynlygy näçe metr barka?