Baglaryň, gülleriň köpdürlüligini artdyrmak, olary has-da baýlaşdyrmak maksady bilen, S.A.Nyýazow adyndaky Türkmen oba hojalyk uniwersitetiniň Botanika bagynda ösümlikleriň bioekologik aýratynlyklaryny öwrenmäge, olary gorap saklamaga gönükdirilen ylmy-barlag işleri geçirilýär. Munuň özi ösümlikleriň dürli görnüşlerini Türkmenistanyň toprak-howa şertlerine uýgunlaşdyrmaga we olaryň biologik aýratynlyklaryny öwrenmäge mümkinçilik berýär. Ösdürip ýetişdirmegiň agrotehnikasy işlenip düzülen ösümlikler bolsa ýurdumyzyň bezeg-bagçylyk işlerinde giňden ulanylýar.
Botanika bagynda ösümlikleriň täze şertlere uýgunlaşmasy kyn bolan görnüşleri, olaryň biologik aýratynlyklaryna laýyklykda, ýörite niýetlenen meýdançalarda ösdürilýär we bu babatdaky kolleksiýa gorunyň üsti ýetirilýär.
