ŞABADYŇ BOÝUNDAKY ÜZÜMLER
Gadymy Şabat akabasynyň uzaboýuna küren tutup oturan obalar bir sapaga düzülen monjuk düwmelerine çalym edýär. Gurbansoltan eje adyndaky etrabyň «Şabat» daýhan birleşiginiň bereketli ekin meýdanlary hem bu akabany alkymlap, gaýralygyna, gözýetime sary uzalyp gidýär. Sähelçe şemala ygşyldaşyp oturan bugdaýly peller, hatar-hatar ýeralmaly ekin meýdanlary daýhan birleşiginiň çäginde tejribeli babadaýhanlaryň halal zähmet çekýändiginiň alamaty. Bu ýerde ösdürilip ýetişdirilmegi ýola goýlan miweli baglaryň dürli görnüşleri, esasan hem, ýaşajyk üzüm baglary göreniň gözüni egleýär.
