Türkmen aga ýöne ýere: «Bagym bar — barym bar» diýmändir. Bagdan alynýan hasyl bazarlarda-da hemişe ýörgünli hem islegli önümler bolmagynda galýar. Şu babatda ýaşulularymyzdan eşidilen degişme äheňli bir gürrüň gulagymyzda galypdyr.
Gadymy döwürlerde gyş aýlary, Arkaçda ýaşaýan bagban gumda ýaşaýan dostuna kişmiş ugradypdyr. Muňa göwni hoş bolan gumly dosty uly saçagyň başynda çagalaryny daşyna üýşürip, olara kişmişiň çöpüni aýryp iýmelidigini düşündirip oturyşyna, çöp saýlamakdan iren bolarly: «Äl-aýt, arkaçly garyndaşlaryň başga işleri ýokmukan-aýt? Bularyň hersine bir çöp dürtüp goýupdyrlar» diýip hüňürdäpdir. «Kişmiş iýseň, çöpi bar» diýen aýtgy-da, belki, şular ýaly bir waka bilen baglanyşykly dörändir.