Sungat dünýäsinde öçmejek yz galdyran Leonardo da Winçi 1452-nji ýylda Italiýanyň Florensiýa şäheriniň golaýyndaky Winçi şäheriniň Ankiano obasynda eneden dogulýar. Onuň sungata bolan zehini ýaşlygyndan döreýär. Leonardonyň zehini köptaraply bolupdyr. Ol köp zatlardan baş çykarypdyr.
Leonardo öz döwrüniň ajaýyp sungat ussady bolmagyndan başga-da, geljekde, ýene ençeme asyrdan oýlanyp tapyljak zatlardan hem habar berip bilipdir. Ol howada uçýan tehnikalaryň çyzgysyny hem çyzypdyr. Leonardo da Winçi diňe bir beýik suratkeş bolman, eýse, heýkeltaraş, binagär, sungat mugallymy, ýazyjy, sazanda, harby inžener, oýlaptapyjy, fizik, matematik, galyberse-de, lukmançylyk bilen baglanyşykly ylymlaryndan hem başy çykypdyr.
