Garaşsyz, baky Bitarap Türkmenistanyň üstünlikli alyp barýan daşary syýasatynda ulag ulgamyna aýratyn orun degişli bolup, hormatly Prezidentimiziň bu ugurda öňe sürýän paýhasly başlangyçlary hem-de netijeli teklipleri dünýä jemgyýetçiligi tarapyndan uly goldawa eýe bolýar.
Häzirki döwürde bütin dünýäde ileri tutulýan ugurlaryň hatarynda ulag diplomatiýasynyň orny barha ýokary derejelere eýe bolýar. Ulag pudagy durnukly ösüşi üpjün etmegi şertlendirýän ýagdaýlaryň biri bolup, dünýäniň sebitlerini we yklymlaryny birleşdiriji güýje öwrülýär. Şoňa laýyklykda, milli Liderimiziň paýhasly başlangyçlary netijesinde ulag geçirijilerini döretmek arkaly Merkezi Aziýany sebit ähmiýetli iri üstaşyr geçiriş çatrygyna öwürmek boýunça giň möçberli işler üstünlikli durmuşa geçirilýär. Gahryman Arkadagymyz 14-nji ýanwarda sanly ulgam arkaly geçiren Türkmenistanyň Ministrler Kabinetiniň nobatdaky mejlisinde «Türkmenistanyň Prezidentiniň ulag diplomatiýasyny ösdürmegiň 2022 — 2025-nji ýyllar üçin Maksatnamasyny» tassyklamak hakyndaky Karara gol çekdi. Şeýle hem Maksatnamadan gelip çykýan wezipeleri üstünlikli ýerine ýetirmek üçin Türkmenistanyň Daşary işler ministrligine, Türkmenistanyň Ministrler Kabinetiniň ýanyndaky Ulag we kommunikasiýalar agentligine bu babatdaky işleri beýleki düzümler bilen bilelikde, utgaşykly hem-de ulgamlaýyn esasda alyp barmalydygy hakynda möhüm tabşyryklary berdi.