Mälim bolşy ýaly, geçen ýylyň 28-nji dekabrynda döwlet Baştutanymyz Gurbanguly Berdimuhamedow Russiýa Federasiýasyna iş saparyny amala aşyryp, Sankt-Peterburgda geçirilen GDA ýurtlarynyň Liderleriniň resmi däl sammitine gatnaşdy. Onuň dowamynda ýurdumyz boýunça GDA-nyň çägindäki ylmy-lukmançylyk ulgamynda hyzmatdaşlygyň täze ugurlary teklip edildi.
Gürrüňe girişmek üçin biraz yza dolanalyň! 1991-nji ýylda dünýäniň syýasy kartasynda özgerişler bolup, täze özbaşdak döwletleriň sany artanda, ykdysadyýeti belli bir derejede biri-birine bagly bolup durýan şol wagtky doganlyk Respublikalarda bir mesele örboýuna galypdy: geljekki garaşsyz ykdysadyýeti nähili guramaly? Edil şol wagt bu meseläni ýekelikde çözmegiň olaryň hiç birine-de oňyn netije bermejegine göz ýetirilensoň, tebigy ýagdaýda Garaşsyz Döwletleriň Arkalaşygyny döretmek pikiri ýüze çykdy, giň goldawa eýe boldy. Onuň maksadynyň dünýä we sebit derejeli meseleler boýunça bilelikde hyzmatdaşlyk etmekdigi kesgitlendi.
