Türkmen-gazak halklary dünýäniň kalbyna äleme nusgalyk dostluk dessanyny ýazýar. Bu iki halkyň diňe ýakyn geografik ýerleşişi däl, eýsem, milli edim-gylymlarynyň, däp-dessurlarynyň ýakynlygy, ruhy gymmatlyklarynyň bir bitewi mazmunlylygy heňňamlaryň jümmüşinden gözbaş alýandyr. Hormatly Prezidentimiziň baştutanlygynda ýurdumyz dünýä döwletleri bilen, şol sanda Gazagystan Respublikasy bilen özara ikitaraplaýyn gatnaşyklary barha ösdürýär. 15-nji maýda Gazagystanyň paýtagty Astana şäherinde geçirilen Ykdysady, ylmy-tehniki we medeni hyzmatdaşlyk boýunça hökümetara türkmen-gazak toparynyň 12-nji mejlisi hem sözümiziň aýdyň güwäsidir. Duşuşygyň dowamynda toparyň 2021-nji ýylyň dekabrynda Aşgabatda geçirilen 11-nji mejlisinde ara alnyp maslahatlaşylan meseleler boýunça pikir alyşmalar boldy. Mejlisde iki ýurduň arasyndaky söwda-ykdysady, ýangyç-energetika ugurlardaky hyzmatdaşlygy has-da çuňlaşdyrmak bilen bagly teklipler ara alnyp maslahatlaşyldy. Mundan başga-da, duşuşygyň dowamynda iki döwletiň arasyndaky ulag-logistika, oba hojalyk, medeni-ynsanperwer ulgamlarynda özara gatnaşyklaryň häzirki ýagdaýy barada pikir alşyldy. Resmi maglumatlara görä, Türkmenistan bilen Gazagystanyň arasynda haryt dolanyşygynyň möçberi 2022-nji ýylda, ondan öňki ýyldaky bilen deňeşdirilende, 69 göterim artdy. Ösüş depgini 2023-nji ýylyň geçen dört aýynyň jemleri boýunça hem hasaba alyndy. Hökümetara türkmen-gazak toparynyň 12-nji mejlisinde Arkadag şäherine aýratyn üns çekilip, ondaky alnyp barylýan işlerde Gazagystanyň gurluşyk we IT kompaniýalary bilen hyzmatdaşlyk etmegiň täze mümkinçiliklerine seredildi.
Iki ýurduň arasyndaky ikitaraplaýyn hyzmatdaşlykda ulag-logistika ulgamyna aýratyn üns berilýär. Mälim bolşy ýaly, Gazagystan — Türkmenistan — Eýran demir ýoly guruldy. Umumy uzynlygy 900 kilometrden gowrak bolan, 825 kilometri Türkmenistanyň çäginden geçýän bu demir ýol Demirgazyk — Günorta ulag geçelgesiniň möhüm bölegine öwrüldi. Ol Pars aýlagynyň ýurtlaryna iň gysga ýoly üpjün edýär. Aktau, Kuryk we Türkmenbaşy Halkara deňiz portlarynyň arasynda özara hyzmatdaşlyk hem ýokary derejede alnyp barylýar.
