Golaýda hormatly Prezidentimiziň Sian şäherinde geçirilen «Merkezi Aziýa — Hytaý» sammitine gatnaşmagy döwletara gatnaşyklaryň okgunly ösdürilýändigini, häzirki döwrüň ýagdaýlaryna görä, onuň täze mazmun bilen baýlaşdyrylýandygyny ýene bir ýola subut etdi. «Merkezi Aziýa — Hytaý» sammiti — hyzmatdaşlygyň täze tapgyryna badalga. Forumy geçirmek üçin Sian şäheriniň saýlanyp alynmagynda hem çuňňur many bar. HHR-iň bu iri senagat, işewürlik, medeni we bilim merkezi gadymy döwürlerde söwda kerwenleriniň ugraýan başlangyç ýeri bolupdyr. Ondan ugraýan kerwenler Beýik Ýüpek ýoly bilen Merkezi Aziýanyň çäginden geçip, Hytaýy we sebitiň beýleki döwletlerini baglanyşdyrypdyrlar. Şunda Sian bilen Mary şäheriniň doganlyk şäherlerdigini bellemek gerek. Bu baradaky degişli Ylalaşyga 2014-nji ýylyň maý aýynda gol çekildi.
«Merkezi Aziýa — Hytaý» sammitinde amaly hyzmatdaşlygy çuňlaşdyrmagyň täze gözýetimleri kesgitlendi. Häzirki wagtda sebitiň dört döwleti — Gyrgyzystan, Türkmenistan, Täjigistan we Özbegistan Hytaý bilen hemmetaraplaýyn strategik hyzmatdaşlygy, Gazagystan bolsa hemişelik hemmetaraplaýyn strategik hyzmatdaşlygy ösdürýär. Munuň özi ýurtlarymyzyň özara hyzmatdaşlygynyň iň ýokary derejelerde ilerledilýändigine şaýatlyk edýär.