Hormatly Prezidentimiz Serdar Berdimuhamedowyň parasatly baştutanlygynda dünýä ýurtlary bilen hoşniýetli gatnaşyklar ösdürilýär. Berkarar döwletiň täze eýýamynyň Galkynyşy döwründe halkara derejesinde amala aşyrylýan umumadamzat bähbitli beýik işlere nazar aýlanyňda buýsanjyň artýar. Hormatly Prezidentimiziň alyp barýan syýasaty parahatçylyga, durnuklylyga, hoşniýetli gatnaşyklara esaslanýar. Bu syýasat halkymyzyň we dünýä halklarynyň parahat, asuda durmuşyna gönükdirilip, hemişelik Bitaraplyk ýörelgelerinden ugur alýar. Hemişelik Bitaraplyk ýörelgesine eýerýän, parahatçylyk söýüjilik we giň halkara hyzmatdaşlyk syýasatyny alyp barýan ýurdumyz dünýä döwletleri bilen dostlukly gatnaşyklary ösdürýär.
Türkmenistan bilen Hytaý Halk Respublikasynyň arasynda hem hoşniýetli gatnaşyklar ösdürilýär. Iki ýurduň arasynda medeni, ykdysady, ynsanperwer ugurlarda uly üstünlikleriň gazanylandygyny hem bellemek gerek. Söwda-ykdysady hyzmatdaşlyk bilen bir hatarda, türkmen-hytaý gatnaşyklarynda bilim, medeniýet, ylym, sport, saglygy goraýyş ugurlary hem aýratyn bellenmäge mynasypdyr. Mälim bolşy ýaly, Türkmenistan bilen Hytaý Halk Respublikasynyň arasynda diplomatik gatnaşyklaryň oňyn netijeleri ýokary derejä eýedir. Şeýle dostlukly hyzmatdaşlygyň ösdürilmegine gönükdirilen gatnaşyklarda taraplar özara bähbitlerini goldaýar. Şeýle hem «Merkezi Aziýa — Hytaý» sammiti birek-birege ynanyşmak esasynda ýola goýulýan gatnaşyklaryň ösdürilmegine giň ýol açýar.