Berkarar döwletimiziň bagtyýarlyk döwri ýurdumyzyň bedew batly ösüşler bilen öňe barýan hem-de jemgyýet jebisliginiň iň bir pugtalanan zamanasyna öwrüldi. Bu döwürde jemgyýetdäki ösüşleriň her biri maşgala agzybirligidir nesil terbiýesi bilen aýrylmaz baglanyşyk esasynda dowam edýär. Muňa Gahryman Arkadagymyzyň: «Maşgala näçe berk boldugyça, jemgyýet hem şonça hemmetaraplaýyn baýdyr» diýen sözleri hem şaýatlyk edýär. Şundan ugur alyp, Ahal welaýat häkimligi, Türkmenistanyň Zenanlar birleşiginiň welaýat bölümi we «Ahal durmuşy» welaýat gazetiniň redaksiýasy bilelikde «Agzybir maşgala — jemgyýet jebisliginiň gözbaşy» diýen at bilen tegelek stoluň başynda söhbetdeşlik geçirdi. Ahal welaýat kitaphanasynda guralan bu söhbetdeşlige Ak bugdaý etrabynyň ýaşaýjysy, mährem ene Ogulşirin Muhammetgulyýewa, welaýat häkimliginiň esasy hünärmeni, Zenanlar bölüminiň başlygynyň orunbasary Aýsoltan Derýaýewa, welaýatyň Polisiýa müdirliginiň jemgyýetçilik howpsuzlygy bölüminiň kämillik ýaşyna ýetmedikler bölümçesiniň müdiri Bilbil Modyýewa, welaýat kitaphanasynyň 1-nji derejeli kitaphanaçysy Ogulsabyr Alowowa, Kaka etrap häkimliginiň Raýat ýagdaýynyň nama ýazgylary bölüminiň müdiri Mähri Amangeldiýewa, Bäherden etrabynyň Bäherden şäher geňeşliginiň hünärmeni, «Ene mähri» ordeniniň eýesi Orazbike Pirmuhammedowa we Ak bugdaý etrabyndaky 10-njy orta mekdebiň mugallymy, «Ene mähri» diýen hormatly adyň eýesi Aýjamal Hossarowa dagy gatnaşdy.
A.DERÝAÝEWA: — Mähriban zenanlar, eziz eneler, hormatly Prezidentimiz «Enä tagzym — mukaddeslige tagzym» atly kitabynda: «Elbetde, adamyň kemala gelmegi üçin jemgyýetiň täsiriniň iňňän uly ähmiýeti bardyr. Ýöne jemgyýetiň ösüşlerine goşandyny goşýan şahsyýetiň, ilhalar ynsanyň kemala gelmegi ata-enäniň göreldesiniň, tälim-terbiýesiniň netijesidir, olaryň perzendi hakyndaky iň süýji arzuwynyň amala aşmagydyr» diýip belleýär. Bu dürdäne jümläniň manysy maşgala agzybirliginiň söýesi bolan eziz eneleriň borç-aladalary bilen aýrylmaz baglanyşyklydyr. Bagtdan paýly, döwletden serpaýly türkmen halkymyzda mähriban enelerimize, zenanlarymyza, gelin-gyzlarymyza sarpa goýmak, olaryň mertebesini belent tutmak, edep-ekramyna, durmuş ýörelgelerine aýratyn söýgi we hormat bilen garamak müňýyllyklardan gözbaş alyp gaýdýan milli ýörelgämizdir.
